Psalms 95
Loxompixan Emi Asu
1Ude nimi, ata emi asu mi Leeme Silok! Atak pixan mi leklek ti ne Moroa, neni ua i kok nedik! 2Ata vot saparav i mi levelinga rotong avukat la atak pixan lengkompixan leklek la emi asu rin. 3Atla Leeme Silok neni Lanaraavuk ne Moroa, neni Loorong Silok i lolos kimit axap levenmoroa xaxarang. 4Neni im gomgonga mavana axap at lavatbung menemen, tuka i ro xeneng tubu at lempatbuang, la uto xa vana at lempatkaana babaalom. 5Neni im gomgonga mavana at laras no neni ga lox i; la laxangka bok no neni axa ga rudum i.6Ude nimi, la ata xis tintiding la ata ngising tin; ata xis mi lempatgulom atdik at lemeren Leeme Silok, neni laradi runtudum li atdik! 7Neni ne Moroa atnedik; la neni ik lok tatao nedik limixin, ta ngan levesipsip no neni im taba luxa di.
Ningina mina ronga i na levelinga i vaase i, i lok keretna. 8“Mi gutak lox ametarauat lebelen nimi, ngan lavalabat atnemi digak lox i ro Meriba, la kerekngan bok mo laaleng digak lok to at lamatbin Masa. 9Diga sosolo asu rak go, la diga lok tong ia, keke i do digara ven pam lempanga silok agak lox i ridi. 10At lavanuet sangaun maares axap, aga bele songsongot tinotno mi mo limixin. Aga lok keretna, “Dixo ruturun tinotno xereva na! Di xopara dina ronga res at levelinga rak.’ 11Aga belemamao nedi la aga lok laxakaape matmatkun tinotno xeretna; mixo epovo rinotno xusu mina beles ap mo lenep kangka aulis atnimi, mo nia aga lok do ana lox amamana nemi ren.’”
Copyright information for
MMX